ஜோதிட சாஸ்திரத்திற்கும் இரத்தினக் கற்களுக்கும் நெருங்கிய தொடர்பு உண்டு. கோள்களுக்கும் இரத்தினங்களுக்கும் உள்ள தொடர்பு ஜோதிட நூல்களில் காணப்படுகிறது. வானில் சுழலும் கோள்களின் இயக்கம் மனிதனின் வாழ்க்கையைப் பாதிப்பதாகச் ஜோதிடம் கூறுகிறது. சாதகத்தை நன்கு ஆராய்ந்து, நல்ல பலன் தரக்கூடிய கோள்களின் இரத்தினத்தை அணிந்து கொள்வது சிறப்பு.
இரத்தினங்களின் வரலாறு
அனைத்து உலக நாடுகளிலும் அரசர்களும், செல்வந்தர்களும் இரத்தினங்களைப் பயன்படுத்தி உள்ளனர் என வரலாற்று ஆசிரியர்கள் குறிப்பிடுகின்றனர். ஹாலாஸ்ய மகாத்மியம் போன்ற வடமொழி நூல்களிலும், தமிழிலுள்ள திருவிளையாடற் புராணத்தில் மாணிக்கம் விற்ற திருவிளையாடல் பகுதியில் இரத்தினங்களின் வகைகளைப் பற்றியும் அவைகளின் இலக்கணத்தைப் பற்றியும் விரிவாகக் கூறப்பட்டுள்ளன. மேலும் சிலப்பதிகாரம், சீவக சிந்தாமணி, சுக்கிர நீதி, தண்டியலங்காரம், நவரத்தின வைத்திய சிந்தாமணி, பட்டினப்பாலை, பதார்த்த குண சிந்தாமணி போன்ற நூல்களிலும் நவஇரத்தினங்களைப் பற்றிய செய்திகள் காணக் கிடக்கின்றன.
இரத்தினங்களைப் பற்றிய விளக்கங்களை கருட புராணத்திலும், அக்கினி புராணத்திலும், சூரிய புராணத்திலும், இரத்தின தீபிகை, இரத்தின பரிட்சை, பிருஹத் சம்ஹிதை போன்ற நூல்களிலும் காணலாம். விஷ்ணு சஹஸ்ரநாமத்தில் உள்ள சுலோகம் ஒன்றில், மஹாவிஷ்ணு கெளஸ்துபம் என்ற இரத்தினத்தை அணிந்திருப்பதாகவும், இது அவருக்கு மிகவும் பிரியமானது என்றும், உலகம் தோன்றுவதற்கு முன்பே தோன்றிய மஹாவிஷ்ணு, கெளஸ்துப மணியை அணிந்திருப்பதாகவும் கூறுகிறது. மேலும், பிரம்மா பிரம்ம மணி அணிந்திருப்பதாகவும், சிவன் ருத்ர மணி அணிந்திருப்பதாகவும், சூரியன் சியமந்தக மணி அணிந்திருப்பதாகவும் புராணங்கள் கூறுகின்றன.
இரத்தினங்களின் தோற்றம்
இரத்தினக் கற்கள் இயற்கையிலேயே பூமிக்குள் உருவாகின்றன. கோடிக்கணக்கான ஆண்டுகளுக்கு முன்பு பூமி ஒரு நெருப்புக் கோளமாக சூரியனிடமிருந்து பிரிந்து வந்தது. பூமியின் மேல் பாகம் குளிர்ந்த பிறகு தான் பூமியில் உயிரினங்கள் தோன்றின. தாதுப் பொருட்கள் இரசாயன மாற்றம் அடைந்து இரத்தினங்களாக உருவாகின்றன. பவளம், முத்து போன்றவை கடலில் உருவாகின்றன. இவ்வாறு பூமிக்குள்ளும், கடலிலும் இயற்கையாக விளையும் இரத்தினக் கற்களுக்கு மற்ற உயிரினங்களைப் போன்றே உயிர்த்துடிப்பு உள்ளவையாக விளங்குவதாகக் கூறப்படுகிறது. இயற்கை இரத்தினங்களின் அதிர்வுகளும் கோள்களின் அதிர்வுகளும் ஒன்றுக்கொன்று தொடர்புடையவை. இரத்தினக் கற்கள் பிரபஞ்சத்திலிருந்து வரும் ஒளியலைகளையும், அதிர்வுகளையும் கிரகித்து, அவைகளை சீரமைத்து சீரான ஒளியலைகளாகவும், மின்-காந்த அதிர்வுகளாகவும் வெளியிடும் ஆற்றல் பெற்றவைகளாகும்.
இரத்தினங்களின் வகைகள்
பூமியில் நூற்றுக்கணக்கான கற்கள் இருந்தாலும் சில வகைக் கற்களே மனிதர்களுக்கு நன்மையைக் கொடுக்கும் தன்மையைக் கொண்டவை என முன்னோர்கள் கண்டறிந்துள்ளனர். இவற்றில் இருபத்தி இரண்டு வகையான இரத்தினங்கள் முக்கியமானவைகளாகக் கூறப்படுகின்றன. அவையாவன:
- மாணிக்கம்
- முத்து
- பவளம்
- மரகதம்
- கனக புஷ்பராகம்
- வைரம்
- நீலம்
- கோமேதகம்
- வைடூரியம்
- கர்கேதனம்
- உருத்திராட்சம்
- விபுலம்
- விமலகம்
- ராஜமணி
- ஸ்படிகம்
- சந்திரகாந்தம்
- செளகாந்திகம்
- சங்கு
- பிரம்ம மணி
- ஜோதிரசம்
- சிவ்யகம்
- பத்மராகம் ஆகும்.
ஜோதிடமும் இரத்தினங்களும்
இரத்தினக் கற்கள் கோள்களின் ஆற்றலை மனிதனுக்குள் செலுத்தும் என்பதால், தனக்கு யோகம் தரும் கோளின் கல்லையே அணிதல் நல்லது. இலக்கினாதிபதியே ஒருவருக்கு முதல் தர யோக காரகர். ஏனெனில் அவர் கேந்திரம், திரிகோணம் எனும் 1 ஆம் வீட்டுக்குரியவர். மேலும் இவர் இலக்கினத்தைக் காப்பவர். உடல்நலம் மற்றும் வலிமையைத் தரும் இலக்கினமே சாதகத்தை ஆள்கிறது. இலக்கினாதிபதி நிலையே சாதகத்தின் முழுமையான பலனுக்கு அடிப்படையாகிறது. எனவே இலக்கினாதிபதிக்குரிய இரத்தினக்கல் துயரங்களை தாண்டிவர உதவி செய்கின்றது.
மற்ற கிரகங்களின் சுப ஆதிபத்தியத்தையும் வலுவையும் கொண்டு மற்ற இரத்தினக் கற்களையும் அணியலாம்.
